WANITA BAHU LAWEYAN
(Prithilan Papat - Rampung)
ꦮꦤꦶꦠꦧꦲꦸꦭꦮꦺꦪꦤ꧀
(ꦥꦿꦶꦛꦶꦭꦤ꧀ꦥꦥꦠ꧀ꦫꦩ꧀ꦥꦸꦁ)
WANITA BAHU LAWEYAN (Prithilan Papat - Rampung) ꦮꦤꦶꦠꦧꦲꦸꦭꦮꦺꦪꦤ꧀ (ꦥꦿꦶꦛꦶꦭꦤ꧀ꦥꦥꦠ꧀ꦫꦩ꧀ꦥꦸꦁ)
CARITA LIYA BAB LAWEYAN
Kurang luwih limang kilométêr sakuloné punjering kutha Sala (Surakarta) ana kampung kang sinêbut Kampung Laweyan, ing Kecamatan kang uga kaaran Laweyan. Miturut panlisiking sujarah, tlatah Laweyan wis ana awit jamané kraton Pajang utawa udakara ing warsa 1568 M.
Kampung Laweyan misuwur amarga para wargane makarya nggawé kain batik ugå laku dagang kain batik kasebut. Wondene bebakalé sing arupa "lawé", utawa bolah kapas (bênang) bakal tênunané saka tlatah Pedan, Klaten, Jawa Tengah.
Kaèlokané, para sudagar (juragan) batik ing Laweyan nalika semana kabèh para wanita kang prigêl rigên anggoné ulah dagang, pramilå amung gantalan wêktu padha sugih singgih lan katêlah kanthi sébutan "Mbok Masé (Mbok Mas)".
Tansaya suwé para "Mbok Masé" nduwèni prabawa lan panguwssa ora ngêmungaké ing babagan dagangan batik nanging sumrambah ing bêbrayan agêng.
Kahanan kang kaya mangkono satêmah nuwuhaké rasa meri ora ngêmungaké saka bêbrayan pasrawungan sakupêngé utåwå sudagar pangudi babagan liyå nanging uga saka kulawarga kraton Mataram.
Nalika semana lamun ana nayaka utawa uwong pênting (pangarsa, tokoh) sing kapidana mati, katindakaké sarana dilawé, têgêsé digantung nganggo tali lawé lan dilêksanakaké ing tlatah Laweyan.
Kajaba dadi papan palêksanan "Ukum Pati Lawé", ing pinggiré kali Laweyan uga dadi papan palêksanan "Ukum Picis", yaiku kang nandhang paukuman saliråné diiris banjur ditètèsi banyu jêruk. Biyuuuuuuh
Kapilihé tlatah Laweyan kanggo papan palêksanan ukuman tartamtu agawé kurang rêna manahing para Mbok Masé lan wargå tlatah Laweyan, amarga mulai mêncungul lan sumêbar carita-carita kurang mranani ngênani tlatah Laweyan sumarambah para sudagar Laweyan.
Babagan kaya mangkono satêmah nuwuhaké rasa sêsatronan kanthi sêsidhêman antaraning para sudagar Laweyan lan kulåwargå kraton Mataram, kang mamuncak saturut kadadèyan "Gègèr Pêcinan" ing Kartasura nalika warsa 1742.
Sinuhun Paku Buwana II sing sêkawit ngikêt prajanjèn karo uwong-uwong Tionghoa sing mlajar saka Batavia amarga ditumpes dèning VOC (9-10 Oktober 1740), malah malik-tingal bêbalanan karo VOC (Belanda), amarga kuwatir kalah pêrang sawisé wêruh wadyabala gabungan Tionghoa - Mataram kasêsêr lan ora ènggal kasil ngrêbut bentèng VOC ing Semarang.
Katambahan manèh VOC nêkakaké wadyabala pambyantu saka Sulawesi Selatan (Makassar).
Tumindaké Paku Buwana II ora disarujuki dèning pangarsa kraton, patih, uga bupati rèh-rèhané Mataram.
Dipandhégani dèning Mas Garendi (Sunan Kuning) lan Kapitèn Sepanjang, pangarsané uwong-uwong Tionghoa, wadyåbålå gabungan kuwi banjur nêmpuh prang marang Mataram lan kasil ngrebut Kraton Kartasura nalika tanggal 30 Juni 1742.
Ing sajêroné paprangan kuwi ana "Srikandi Tionghoa" uga ana kang mastani "Mulan van Java", saka Kebumen sing mèlu nggabung wadyabalané R.M Garendi, yaiku Raden Ayu Tan Peng Nio, putriné Tan Wan Swee, sènapati (jendral) kang mlajar saka nagri Tiongkok (Cina).
Sapèrangan ahli sujarah nyêrat Tay Wan Soey, kang uga katêlah Souw Phan Chiang, ... banjur katêlah sêbatan Kapitèn Sepanjang.
Paku Buwana II sing mlajar såkå kraton Kartasura mampir ing tlatah Laweyan arså nyambut turånggå-turånggå gadhahané pårå sudagar Laweyan kanggo nêrusaké tindaké mênyang Ponorogo. Nanging pårå sudagar Laweyan samyå nulak pamundhutaning Sinuhun Paku Buwana II. Satêmah Sinuhun dukå, ngundhåmånå ugå nibakaké supåtå lan wêwalêr, yèn putrå turuning ora kêparêng jêjodhohan karo wanitå-wanitå sudagar kåyå Mbok Masé, sêmono ugå kosok waliké.
Awit sêmånå mulai kasêbar caritå "Wanita Bahu Lawéyan", yåiku wanitå sudagar ing Laweyan bisané sugih singgih amargå duwé ingon-ingon ulå Blorong kang manggon anèng -nuwun sèwu- pawèstrèné. Ulå Blorong kuwi minangkå pêsugihan sing tumbalé priyå kang pulang-asmårå utåwå dadi garwané Mbok Masé kuwi.
Saturut owah gingsiring jaman, lumakuning wêktu, jantraning kahanan, sudagar batik Laweyan wis ora mligi para wanita nanging uga akèh para priyané.
Èwasêmono ing babagan jêjodhohan para sudagar Laweyan ijih samyå ngugêmi adat padatan turun tumurun yaiku ngutamakaké bêbèsanan antaraning nak dulur sudagar Laweyan dhéwé.
PANUTUP
Tibaning pêpêsthèn babagan kukuting yuswåné manungså pancèn ing Panguwasaning Gusti Hingkang Akarya Jagad Amurba Amisésa sagung tumitah, nanging jalaran tumuju pati pancèn manèka-wêrni, tan kêna winêca.
Tumraping tanah Jawa carita ngênani "Wanita Bahu Lawêyan" biså kaanggêp caritå andupårå, mitos, utawa legenda, nanging kanyatané ana sapèrangan uwong kang mêruhi palah dadi bagèyan såkå lêlakon kadadèyan sing nora tinêmu nalar kuwi.
Sanadyan titah diwênangaké ambudidaya mêsu budi ngêtog rågå, ngudi kawruh ciptå lan rasa sakathok pantogé, nanging têtêp waé akèh kang ijih dadi wadining jagad, sinêngkêring bawånå, rahasyaning alam. Pramila, samångså ijih akèh kang rêmêng surêng, durung winanci, winatêsing wiradat, manungsa bakal angarêp-arêp, èling lan sumarah mring Panguwasaning Gusti.
Cathêtan
Kapêthik lan kaimpun sarta kasulih basa saking sêratan lan pidiyo Youtube ing ratmsya.
Dening : Rahayu sagung dumadi.
Yoga Hart, Surabaya, Mei 2023.
Kaserat Malih dening : Kanti Suci Project
__________
ꦮꦤꦶꦠꦧꦲꦸꦭꦮꦺꦪꦤ꧀
(ꦥꦿꦶꦛꦶꦭꦤ꧀ꦥꦥꦠ꧀ꦫꦩ꧀ꦥꦸꦁ)
ꦕꦫꦶꦠꦭꦶꦪꦧꦧ꧀ꦭꦮꦺꦪꦤ꧀
꧋ꦏꦸꦫꦁꦭꦸꦮꦶꦃꦭꦶꦩꦁꦏꦶꦭꦺꦴꦩꦺꦠꦼꦂꦱꦏꦸꦭꦺꦴꦤꦺꦥꦸꦚ꧀ꦗꦺꦫꦶꦁꦏꦸꦛꦱꦭ(ꦱꦸꦫꦏꦂꦠ)ꦄꦤꦏꦩ꧀ꦥꦸꦁꦏꦁꦱꦶꦤꦼꦧꦸꦠ꧀ꦏꦩ꧀ꦥꦸꦁꦭꦮꦺꦪꦤ꧀ꦆꦁꦏꦼꦕꦩꦠꦤ꧀ꦏꦁꦈꦒꦏꦄꦫꦤ꧀ꦭꦮꦺꦪꦤ꧀꧈ꦩꦶꦠꦸꦫꦸꦠ꧀ꦥꦤ꧀ꦭꦶꦱꦶꦏꦶꦁꦱꦸꦗꦫꦃ꧈ꦠ꧀ꦭꦠꦃꦭꦮꦺꦪꦤ꧀ꦮꦶꦱ꧀ꦄꦤꦄꦮꦶꦠ꧀ꦗꦩꦤꦺꦏꦿꦠꦺꦴꦤ꧀ꦥꦗꦁꦈꦠꦮꦈꦣꦏꦫꦆꦁꦮꦂꦱ꧇꧑꧕꧖꧘꧇ꦩ꧀꧈
꧋ꦏꦩ꧀ꦥꦸꦁꦭꦮꦺꦪꦤ꧀ꦩꦶꦱꦸꦮꦸꦂꦄꦩꦂꦒꦥꦫꦮꦂꦒꦤꦺꦩꦏꦂꦪꦔ꧀ꦒꦮꦺꦏꦻꦤ꧀ꦧꦠꦶꦏ꧀ꦈꦒ꧀åꦭꦏꦸꦣꦒꦁꦏꦻꦤ꧀ꦧꦠꦶꦏ꧀ꦏꦱꦺꦧꦸꦠ꧀꧈ꦮꦺꦴꦤ꧀ꦝꦺꦤꦺꦧꦼꦧꦏꦭꦺꦱꦶꦁꦄꦫꦸꦥ"ꦭꦮꦺ"꧈ꦈꦠꦮꦧꦺꦴꦭꦃꦏꦥꦱ꧀(ꦧꦼꦤꦁ)ꦧꦏꦭ꧀ꦠꦼꦤꦸꦤꦤꦺꦱꦏꦠ꧀ꦭꦠꦃꦥꦼꦣꦤ꧀ꦏ꧀ꦭꦠꦺꦤ꧀ꦗꦮꦠꦼꦔꦃ꧉
꧋ꦏꦌꦭꦺꦴꦏꦤꦺ꧈ꦥꦫꦱꦸꦣꦒꦂ(ꦗꦸꦫꦒꦤ꧀)ꦧꦠꦶꦏ꧀ꦆꦁꦭꦮꦺꦪꦤ꧀ꦤꦭꦶꦏꦱꦼꦩꦤꦏꦧꦺꦃꦥꦫꦮꦤꦶꦠꦏꦁꦥꦿꦶꦒꦼꦭ꧀ꦫꦶꦒꦼꦤ꧀ꦄꦁꦒꦺꦴꦤꦺꦈꦭꦃꦣꦒꦁ꧈ꦥꦿꦩꦶꦭ꧀åꦄꦩꦸꦁꦒꦤ꧀ꦠꦭꦤ꧀ꦮꦼꦏ꧀ꦠꦸꦥꦣꦱꦸꦒꦶꦃꦱꦶꦁꦒꦶꦃꦭꦤ꧀ꦏꦠꦼꦭꦃꦏꦤ꧀ꦛꦶꦱꦺꦧꦸꦠꦤ꧀"ꦩ꧀ꦧꦺꦴꦏ꧀ꦩꦱꦺ(ꦩ꧀ꦧꦺꦴꦏ꧀ꦩꦱ꧀)"꧉
꧋ꦠꦤ꧀ꦱꦪꦱꦸꦮꦺꦥꦫ"ꦩ꧀ꦧꦺꦴꦏ꧀ꦩꦱꦺ"ꦤ꧀ꦝꦸꦮꦺꦤꦶꦥꦿꦧꦮꦭꦤ꧀ꦥꦔꦸꦮ꧀ꦱ꧀ꦱꦎꦫꦔꦼꦩꦸꦔꦏꦺꦆꦁꦧꦧꦒꦤ꧀ꦝꦒꦔꦤ꧀ꦧꦠꦶꦏ꧀ꦤꦔꦶꦁꦱꦸꦩꦿꦩ꧀ꦧꦃꦆꦁꦧꦼꦧꦿꦪꦤ꧀ꦄꦒꦼꦁ꧉
꧋ꦏꦲꦤꦤ꧀ꦏꦁꦏꦪꦩꦁꦏꦺꦴꦤꦺꦴꦱꦠꦼꦩꦃꦤꦸꦮꦸꦲꦏꦺꦫꦱꦩꦼꦫꦶꦎꦫꦔꦼꦩꦸꦔꦏꦺꦱꦏꦧꦼꦧꦿꦪꦤ꧀ꦥꦱꦿꦮꦸꦔꦤ꧀ꦱꦏꦸꦥꦼꦔꦺꦈꦠ꧀åꦮ꧀åꦱꦸꦣꦒꦂꦥꦔꦸꦣꦶꦧꦧꦒꦤ꧀ꦭꦶꦪ꧀åꦤꦔꦶꦁꦈꦒꦱꦏꦏꦸꦭꦮꦂꦒꦏꦿꦠꦺꦴꦤ꧀ꦩꦠꦫꦩ꧀꧈
꧋ꦤꦭꦶꦏꦱꦼꦩꦤꦭꦩꦸꦤ꧀ꦄꦤꦤꦪꦏꦈꦠꦮꦈꦮꦺꦴꦁꦥꦼꦤ꧀ꦠꦶꦁ(ꦥꦔꦂꦱ꧈ꦠꦺꦴꦏꦺꦴꦃ)ꦱꦶꦁꦏꦥꦶꦣꦤꦩꦠꦶ꧈ꦏꦠꦶꦤ꧀ꦝꦏꦏꦺꦱꦫꦤꦣꦶꦭꦮꦺ꧈ꦠꦼꦒꦼꦱꦺꦣꦶꦒꦤ꧀ꦠꦸꦁꦔꦁꦒꦺꦴꦠꦭꦶꦭꦮꦺꦭꦤ꧀ꦝꦶꦊꦏ꧀ꦱꦤꦏꦏꦺꦆꦁꦠ꧀ꦭꦠꦃꦭꦮꦺꦪꦤ꧀꧈
꧋ꦏꦗꦧꦣꦝꦶꦥꦥꦤ꧀ꦥꦊꦏ꧀ꦱꦤꦤ꧀"ꦈꦏꦸꦩ꧀ꦥꦠꦶꦭꦮꦺ"꧈ꦆꦁꦥꦶꦁꦒꦶꦫꦺꦏꦭꦶꦭꦮꦺꦪꦤ꧀ꦈꦒꦣꦝꦶꦥꦥꦤ꧀ꦥꦊꦏ꧀ꦱꦤꦤ꧀"ꦈꦏꦸꦩ꧀ꦥꦶꦕꦶꦱ꧀"꧈ꦪꦻꦏꦸꦏꦁꦤꦤ꧀ꦝꦁꦥꦻꦴꦏꦸꦩꦤ꧀ꦱꦭꦶꦂåꦤꦺꦣꦶꦆꦫꦶꦱ꧀ꦧꦚ꧀ꦗꦸꦂꦣꦶꦠꦺꦠꦺꦱꦶꦧꦚꦸꦗꦼꦫꦸꦏ꧀꧈ꦧꦶꦪꦸꦈꦈꦈꦈꦈꦃ
꧋ꦏꦥꦶꦭꦶꦲꦺꦠ꧀ꦭꦠꦃꦭꦮꦺꦪꦤ꧀ꦏꦁꦒꦺꦴꦥꦥꦤ꧀ꦥꦊꦏ꧀ꦱꦤꦤ꧀ꦈꦏꦸꦩꦤ꧀ꦠꦂꦠꦩ꧀ꦠꦸꦄꦒꦮꦺꦏꦸꦫꦁꦉꦤꦩꦤꦲꦶꦁꦥꦫꦩ꧀ꦧꦺꦴꦏ꧀ꦩꦱꦺꦭꦤ꧀ꦮꦂꦒ꧀åꦠ꧀ꦭꦠꦃꦭꦮꦺꦪꦤ꧀ꦄꦩꦂꦒꦩꦸꦭꦻꦩꦼꦚ꧀ꦕꦸꦔꦸꦭ꧀ꦭꦤ꧀ꦱꦸꦩꦼꦧꦂꦕꦫꦶꦠꦕꦫꦶꦠꦏꦸꦫꦁꦩꦿꦤꦤꦶꦔꦼꦤꦤꦶꦠ꧀ꦭꦠꦃꦭꦮꦺꦪꦤ꧀ꦱꦸꦩꦫꦩ꧀ꦧꦃꦥꦫꦱꦸꦣꦒꦂꦭꦮꦺꦪꦤ꧀꧈
꧋ꦧꦧꦒꦤ꧀ꦏꦪꦩꦁꦏꦺꦴꦤꦺꦴꦱꦠꦼꦩꦃꦤꦸꦮꦸꦲꦏꦺꦫꦱꦱꦼꦱꦠꦿꦺꦴꦤꦤ꧀ꦏꦤ꧀ꦛꦶꦱꦼꦱꦶꦣꦼꦩꦤ꧀ꦄꦤ꧀ꦠꦫꦤꦶꦁꦥꦫꦱꦸꦣꦒꦂꦭꦮꦺꦪꦤ꧀ꦭꦤ꧀ꦏꦸꦭ꧀åꦮꦂꦒ꧀åꦏꦿꦠꦺꦴꦤ꧀ꦩꦠꦫꦩ꧀ꦏꦁꦩꦩꦸꦚ꧀ꦕꦏ꧀ꦱꦠꦸꦫꦸꦠ꧀ꦏꦣꦝꦺꦪꦤ꧀"ꦒꦺꦒꦺꦂꦥꦼꦕꦶꦤꦤ꧀"ꦆꦁꦏꦂꦠꦱꦸꦫꦤꦭꦶꦏꦮꦂꦱ꧇꧑꧗꧔꧒꧇꧉
꧋ꦱꦶꦤꦸꦲꦸꦤ꧀ꦥꦏꦸꦧꦸꦮꦤ꧇꧒꧇ꦱꦶꦁꦱꦼꦏꦮꦶꦠ꧀ꦔꦶꦏꦼꦠ꧀ꦥꦿꦗꦚ꧀ꦗꦺꦤ꧀ꦏꦫꦺꦴꦈꦮꦺꦴꦁꦈꦮꦺꦴꦁꦠꦶꦪꦺꦴꦁꦲꦺꦴꦮꦱꦶꦁꦩ꧀ꦭꦗꦂꦱꦏꦧꦠꦮ꦳ꦶꦪꦄꦩꦂꦒꦣꦶꦠꦸꦩ꧀ꦥꦺꦱ꧀ꦝꦺꦤꦶꦁꦮ꦳ꦺꦴꦕ꧀(꧇꧙꧇꧇꧑꧐꧇ꦎꦏ꧀ꦠꦺꦴꦧꦼꦂ꧇꧑꧗꧔꧐꧇)꧈ꦩꦭꦃꦩꦭꦶꦏ꧀ꦠꦶꦔꦭ꧀ꦧꦼꦧꦭꦤꦤ꧀ꦏꦫꦺꦴꦮ꦳ꦺꦴꦕ꧀(ꦧꦺꦭꦤ꧀ꦝ)꧈ꦄꦩꦂꦒꦏꦸꦮꦠꦶꦂꦏꦭꦃꦥꦼꦫꦁꦱꦮꦶꦱꦺꦮꦼꦫꦸꦃꦮꦣꦾꦧꦭꦒꦧꦸꦔꦤ꧀ꦠꦶꦪꦺꦴꦁꦲꦺꦴꦮꦩꦠꦫꦩ꧀ꦏꦱꦼꦱꦼꦂꦭꦤ꧀ꦎꦫꦌꦁꦒꦭ꧀ꦏꦱꦶꦭ꧀ꦔꦿꦼꦧꦸꦠ꧀ꦧꦺꦤ꧀ꦠꦺꦁꦮ꦳ꦺꦴꦕ꧀ꦆꦁꦱꦼꦩꦫꦁ꧉
꧋ꦏꦠꦩ꧀ꦧꦲꦤ꧀ꦩꦤꦺꦃꦮ꦳ꦺꦴꦕ꧀ꦤꦼꦏꦏꦏꦺꦮꦣꦾꦧꦭꦥꦩ꧀ꦧꦾꦤ꧀ꦠꦸꦱꦏꦱꦸꦭꦮꦺꦱꦶꦱꦼꦭꦠꦤ꧀(ꦩꦏꦱ꧀ꦱꦂ)꧉
꧋ꦠꦸꦩꦶꦤ꧀ꦝꦏꦺꦥꦏꦸꦧꦸꦮꦤ꧇꧒꧇ꦎꦫꦣꦶꦱꦫꦸꦗꦸꦏꦶꦣꦺꦤꦶꦁꦥꦔꦂꦱꦏꦿꦠꦺꦴꦤ꧀ꦥꦠꦶꦃ꧈ꦈꦒꦧꦸꦥꦠꦶꦫꦺꦃꦫꦺꦲꦤꦺꦩꦠꦫꦩ꧀꧈
꧋ꦣꦶꦥꦤ꧀ꦝꦺꦒꦤꦶꦣꦺꦤꦶꦁꦩꦱ꧀ꦒꦫꦺꦤ꧀ꦝꦶ(ꦱꦸꦤꦤ꧀ꦏꦸꦤꦶꦁ)ꦭꦤ꧀ꦏꦥꦶꦠꦺꦤ꧀ꦱꦼꦥꦚ꧀ꦗꦁ꧈ꦥꦔꦂꦱꦤꦺꦈꦮꦺꦴꦁꦈꦮꦺꦴꦁꦠꦶꦪꦺꦴꦁꦲꦺꦴꦮ꧈ꦮꦣ꧀ꦪ꧀åꦧ꧀åꦭ꧀åꦒꦧꦸꦔꦤ꧀ꦏꦸꦮꦶꦧꦚ꧀ꦗꦸꦂꦤꦼꦩ꧀ꦥꦸꦃꦥꦿꦁꦩꦫꦁꦩꦠꦫꦩ꧀ꦭꦤ꧀ꦏꦱꦶꦭ꧀ꦔꦿꦼꦧꦸꦠ꧀ꦏꦿꦠꦺꦴꦤ꧀ꦏꦂꦠꦱꦸꦫꦤꦭꦶꦏꦠꦁꦒꦭ꧀꧇꧓꧐꧇ꦗꦸꦤꦶ꧇꧑꧗꧔꧒꧇꧉
꧋ꦆꦁꦱꦗꦼꦫꦺꦴꦤꦺꦥꦥꦿꦔꦤ꧀ꦏꦸꦮꦶꦄꦤ"ꦱꦿꦶꦏꦤ꧀ꦝꦶꦠꦶꦪꦺꦴꦁꦲꦺꦴꦮ"ꦈꦒꦄꦤꦏꦁꦩꦱ꧀ꦠꦤꦶ"ꦩꦸꦭꦤ꧀ꦮ꦳ꦤ꧀ꦗꦮ꦳"꧈ꦱꦏꦏꦼꦧꦸꦩꦺꦤ꧀ꦱꦶꦁꦩꦺꦭꦸꦔ꧀ꦒꦧꦸꦁꦮꦣꦾꦧꦭꦤꦺꦫ꧀꧈ꦩ꧀ꦒꦫꦺꦤ꧀ꦝꦶ꧈ꦪꦻꦏꦸꦫꦣꦺꦤ꧀ꦄꦪꦸꦠꦤ꧀ꦥꦼꦁꦤꦶꦪꦺꦴ꧈ꦥꦸꦠꦿꦶꦤꦺꦠꦤ꧀ꦮꦤ꧀ꦱ꧀ꦮꦼꦄꦼ꧈ꦱꦺꦤꦥꦠꦶ(ꦗꦼꦤ꧀ꦝꦿꦭ꧀)ꦏꦁꦩ꧀ꦭꦗꦂꦱꦏꦤꦒꦿꦶꦠꦶꦪꦺꦴꦁꦏꦺꦴꦏ꧀(ꦕꦶꦤ)꧉
꧋ꦱꦥꦺꦫꦔꦤ꧀ꦄꦃꦭꦶꦱꦸꦗꦫꦃꦚꦼꦫꦠ꧀ꦠꦪ꧀ꦮꦤ꧀ꦱꦺꦴꦮꦺꦪ꧀ꦏꦁꦈꦒꦏꦠꦼꦭꦃꦱꦺꦴꦈꦮ꧀ꦥ꧀ꦲꦤ꧀ꦕ꧀ꦲꦶꦪꦁ꧈꧉꧉꧉ꦧꦚ꧀ꦗꦸꦂꦏꦠꦼꦭꦃꦱꦼꦧꦠꦤ꧀ꦏꦥꦶꦠꦺꦤ꧀ꦱꦼꦥꦚ꧀ꦗꦁ꧉
꧋ꦥꦏꦸꦧꦸꦮꦤ꧇꧒꧇ꦱꦶꦁꦩ꧀ꦭꦗꦂꦱ꧀åꦏ꧀åꦏꦿꦠꦺꦴꦤ꧀ꦏꦂꦠꦱꦸꦫꦩꦩ꧀ꦥꦶꦂꦆꦁꦠ꧀ꦭꦠꦃꦭꦮꦺꦪꦤ꧀ꦄꦂꦱ꧀åꦚꦩ꧀ꦧꦸꦠ꧀ꦠꦸꦂåꦔ꧀ꦒ꧀åꦠꦸꦂåꦔ꧀ꦒ꧀åꦒꦣꦲꦤꦺꦥ꧀åꦫ꧀åꦱꦸꦣꦒꦂꦭꦮꦺꦪꦤ꧀ꦏꦁꦒꦺꦴꦤꦼꦫꦸꦱꦏꦺꦠꦶꦤ꧀ꦝꦏꦺꦩꦼꦚꦁꦥꦺꦴꦤꦺꦴꦫꦺꦴꦒꦺꦴ꧉ꦤꦔꦶꦁꦥ꧀åꦫ꧀åꦱꦸꦣꦒꦂꦭꦮꦺꦪꦤ꧀ꦱꦩ꧀ꦪ꧀åꦤꦸꦭꦏ꧀ꦥꦩꦸꦤ꧀ꦝꦸꦠꦤꦶꦁꦱꦶꦤꦸꦲꦸꦤ꧀ꦥꦏꦸꦧꦸꦮꦤ꧇꧒꧇꧉ꦱꦠꦼꦩꦃꦱꦶꦤꦸꦲꦸꦤ꧀ꦝꦸꦏ꧀å꧈ꦔꦸꦤ꧀ꦝ꧀åꦩ꧀åꦤ꧀åꦈꦒ꧀åꦤꦶꦧꦏꦏꦺꦱꦸꦥ꧀åꦠ꧀åꦭꦤ꧀ꦮꦼꦮꦊꦂ꧈ꦪꦺꦤ꧀ꦥꦸꦠ꧀ꦫ꧀åꦠꦸꦫꦸꦤꦶꦁꦎꦫꦏꦼꦥꦉꦁꦗꦼꦗꦺꦴꦣꦺꦴꦲꦤ꧀ꦏꦫꦺꦴꦮꦤꦶꦠ꧀åꦮꦤꦶꦠ꧀åꦱꦸꦣꦒꦂꦏ꧀åꦪ꧀åꦩ꧀ꦧꦺꦴꦏ꧀ꦩꦱꦺ꧈ꦱꦼꦩꦺꦴꦤꦺꦴꦈꦒ꧀åꦏꦺꦴꦱꦺꦴꦏ꧀ꦮꦭꦶꦏꦺ꧉
꧋ꦄꦮꦶꦠ꧀ꦱꦼꦩ꧀åꦤ꧀åꦩꦸꦭꦻꦏꦱꦼꦧꦂꦕꦫꦶꦠ꧀å"ꦮꦤꦶꦠꦧꦲꦸꦭꦮꦺꦪꦤ꧀"꧈ꦪ꧀åꦆꦏꦸꦮꦤꦶꦠ꧀åꦱꦸꦣꦒꦂꦆꦁꦭꦮꦺꦪꦤ꧀ꦧꦶꦱꦤꦺꦱꦸꦒꦶꦃꦱꦶꦁꦒꦶꦃꦄꦩꦂꦒ꧀åꦣꦸꦮꦺꦆꦔꦺꦴꦤ꧀ꦆꦔꦺꦴꦤ꧀ꦈꦭ꧀åꦧ꧀ꦭꦺꦴꦫꦺꦴꦁꦏꦁꦩꦁꦒꦺꦴꦤ꧀ꦄꦤꦺꦁꦤꦸꦮꦸꦤ꧀ꦱꦺꦮꦸꦥꦮꦺꦱ꧀ꦠꦿꦺꦤꦺ꧉ꦈꦭ꧀åꦧ꧀ꦭꦺꦴꦫꦺꦴꦁꦏꦸꦮꦶꦩꦶꦤꦁꦏ꧀åꦥꦼꦱꦸꦒꦶꦲꦤ꧀ꦱꦶꦁꦠꦸꦩ꧀ꦧꦭꦺꦥꦿꦶꦪ꧀åꦏꦁꦥꦸꦭꦁꦄꦱ꧀ꦩ꧀åꦫ꧀åꦈꦠ꧀åꦮ꧀åꦣꦝꦶꦒꦂꦮꦤꦺꦩ꧀ꦧꦺꦴꦏ꧀ꦩꦱꦺꦏꦸꦮꦶ꧉
꧋ꦱꦠꦸꦫꦸꦠ꧀ꦎꦮꦃꦒꦶꦁꦱꦶꦫꦶꦁꦗꦩꦤ꧀ꦭꦸꦩꦏꦸꦤꦶꦁꦮꦼꦏ꧀ꦠꦸ꧈ꦗꦤ꧀ꦠꦿꦤꦶꦁꦏꦲꦤꦤ꧀ꦱꦸꦣꦒꦂꦧꦠꦶꦏ꧀ꦭꦮꦺꦪꦤ꧀ꦮꦶꦱ꧀ꦎꦫꦩ꧀ꦭꦶꦒꦶꦥꦫꦮꦤꦶꦠꦤꦔꦶꦁꦈꦒꦄꦏꦺꦃꦥꦫꦥꦿꦶꦪꦤꦺ꧉
꧋ꦌꦮꦱꦼꦩꦺꦴꦤꦺꦴꦆꦁꦧꦧꦒꦤ꧀ꦗꦼꦗꦺꦴꦣꦺꦴꦲꦤ꧀ꦥꦫꦱꦸꦣꦒꦂꦭꦮꦺꦪꦤ꧀ꦆꦗꦶꦃꦱꦩ꧀ꦪ꧀åꦔꦸꦒꦼꦩꦶꦄꦣꦠ꧀ꦥꦣꦠꦤ꧀ꦠꦸꦫꦸꦤ꧀ꦠꦸꦩꦸꦫꦸꦤ꧀ꦪꦻꦏꦸꦔꦸꦠꦩꦏꦏꦺꦧꦼꦧꦺꦱꦤꦤ꧀ꦄꦤ꧀ꦠꦫꦤꦶꦁꦤꦏ꧀ꦝꦸꦭꦸꦂꦱꦸꦣꦒꦂꦭꦮꦺꦪꦤ꧀ꦝꦺꦮꦺ꧉
ꦥꦤꦸꦠꦸꦥ꧀꧈
꧋ꦠꦶꦧꦤꦶꦁꦥꦼꦥꦼꦱ꧀ꦛꦺꦤ꧀ꦧꦧꦒꦤ꧀ꦏꦸꦏꦸꦠꦶꦁꦪꦸꦱ꧀ꦮ꧀åꦤꦺꦩꦤꦸꦁꦱ꧀åꦥꦚ꧀ꦕꦺꦤ꧀ꦆꦁꦥꦔꦸꦮꦱꦤꦶꦁꦒꦸꦱ꧀ꦠꦶꦲꦶꦁꦏꦁꦄꦏꦂꦪꦗꦒꦣ꧀ꦄꦩꦸꦂꦧꦄꦩꦶꦱꦺꦱꦱꦒꦸꦁꦠꦸꦩꦶꦠꦃ꧈ꦤꦔꦶꦁꦗꦭꦫꦤ꧀ꦠꦸꦩꦸꦗꦸꦥꦠꦶꦥꦚ꧀ꦕꦺꦤ꧀ꦩꦤꦺꦏꦮꦼꦂꦤꦶ꧈ꦠꦤ꧀ꦏꦼꦤꦮꦶꦤꦼꦕ꧉
꧋ꦠꦸꦩꦿꦥꦶꦁꦠꦤꦃꦗꦮꦕꦫꦶꦠꦔꦼꦤꦤꦶ"ꦮꦤꦶꦠꦧꦲꦸꦭꦮꦼꦪꦤ꧀"ꦧꦶꦱ꧀åꦏꦄꦁꦒꦼꦥ꧀ꦕꦫꦶꦠ꧀åꦄꦤ꧀ꦝꦸꦥ꧀åꦫ꧀å꧈ꦩꦶꦠꦺꦴꦱ꧀ꦈꦠꦮꦊꦒꦺꦤ꧀ꦝ꧈ꦤꦔꦶꦁꦏꦚꦠꦤꦺꦄꦤꦱꦥꦺꦫꦔꦤ꧀ꦈꦮꦺꦴꦁꦏꦁꦩꦼꦫꦸꦲꦶꦥꦭꦃꦣꦝꦶꦧꦒꦺꦪꦤ꧀ꦱ꧀åꦏ꧀åꦊꦭꦏꦺꦴꦤ꧀ꦏꦣꦝꦺꦪꦤ꧀ꦱꦶꦁꦤꦺꦴꦫꦠꦶꦤꦼꦩꦸꦤꦭꦂꦏꦸꦮꦶ꧉
꧋ꦱꦤꦣꦾꦤ꧀ꦠꦶꦠꦃꦣꦶꦮꦼꦤꦔꦏꦺꦄꦩ꧀ꦧꦸꦣꦶꦣꦪꦩꦼꦱꦸꦧꦸꦣꦶꦔꦼꦠꦺꦴꦒ꧀ꦫ꧀åꦒ꧀å꧈ꦔꦸꦣꦶꦏꦮꦿꦸꦃꦕꦶꦥ꧀ꦠ꧀åꦭꦤ꧀ꦫꦱꦱꦏꦛꦺꦴꦏ꧀ꦥꦤ꧀ꦠꦺꦴꦒꦺ꧈ꦤꦔꦶꦁꦠꦼꦠꦼꦥ꧀ꦮꦌꦄꦏꦺꦃꦏꦁꦆꦗꦶꦃꦣꦝꦶꦮꦣꦶꦤꦶꦁꦗꦒꦣ꧀ꦱꦶꦤꦼꦁꦏꦼꦫꦶꦁꦧꦮ꧀åꦤ꧀å꧈ꦫꦲꦱꦾꦤꦶꦁꦄꦭꦩ꧀꧈ꦥꦿꦩꦶꦭ꧈ꦱꦩ꧀åꦔ꧀ꦱ꧀åꦆꦗꦶꦃꦄꦏꦺꦃꦏꦁꦉꦩꦼꦁꦱꦸꦉꦁ꧈ꦣꦸꦫꦸꦁꦮꦶꦤꦚ꧀ꦕꦶ꧈ꦮꦶꦤꦠꦼꦱꦶꦁꦮꦶꦫꦣꦠ꧀ꦩꦤꦸꦁꦱꦧꦏꦭ꧀ꦄꦔꦉꦥ꧀ꦄꦉꦥ꧀ꦌꦭꦶꦁꦭꦤ꧀ꦱꦸꦩꦫꦃꦩꦿꦶꦁꦥꦔꦸꦮꦱꦤꦶꦁꦒꦸꦱ꧀ꦠꦶ꧉
ꦕꦛꦼꦠꦤ꧀꧈
꧋ꦏꦥꦼꦛꦶꦏ꧀ꦭꦤ꧀ꦏꦻꦩ꧀ꦥꦸꦤ꧀ꦱꦂꦠꦏꦱꦸꦭꦶꦃꦧꦱꦱꦏꦶꦁꦱꦼꦫꦠꦤ꧀ꦭꦤ꧀ꦥꦶꦣꦶꦪꦺꦴꦪꦺꦴꦈꦠꦸꦧꦺꦆꦁꦫꦠ꧀ꦩ꧀ꦱꦾ꧉
ꦣꦼꦤꦶꦁ꧇ꦫꦲꦪꦸꦱꦒꦸꦁꦣꦸꦩꦣꦶ꧉
ꦪꦺꦴꦒꦲꦂꦠ꧀ꦯꦸꦫꦨꦪ꧈ꦩꦺꦪꦶ꧇꧒꧐꧒꧓꧇꧉
ꦏꦱꦺꦫꦠ꧀ꦩꦭꦶꦃꦣꦼꦤꦶꦁ꧇ꦏꦤ꧀ꦠꦶꦱꦸꦕꦶꦥꦿꦺꦴꦗꦺꦕ꧀ꦠ꧀
